Blackpool í úrslitaleikinn á móti West Ham

Blackpool tryggði sér í kvöld sæti í úrslitaleiknum um laust sæti í ensku úrvalsdeildinni á næsta tímabili þegar náði 2-2 janftefli á útivelli á móti Birmingham í seinni leik liðanna í undanúrslitunum umspilsins í ensku b-deildinni. Blackpool komst í 2-0 og þar með í 3-0 samanlagt en Birmingham setti spennu í leikinn með því að jafna metin. Birmingham þurfti hinsvegar að skora tvö mörk til viðbótar en það tókst ekki og Blackpool komst áfram.

Blackpool mætir West Ham á Wembley 19. maí næstkomandi en sigurvegari leiksins fylgir Reading og Southampton upp í ensku úrvalsdeildina. Blackpool féll úr ensku úrvalsdeildinni síðasta vor eftir að hafa komist þangað í gegnum umspilið vorið 2010.

Stephen Dobbie kom Blackpool í 1-0 á lokamínútu fyrri hálfleiks en markið kom eftir hornspyrnu og misheppnaða hjólgestaspyrnu hjá Alex Baptiste. Matt Phillips bætti við öðru marki eftir aðeins þrjár mínútur í seinni hálfleik og fór með því langt með að gera út um einvígið.

Leikmenn Birmingham voru ekki hættir. Nikola Zigic minnkaði muninn á 64. mínútu en hann var greinilega rangstæður þegar hann fékk boltann frá Chris Burke í teignum.

Curtis Davies jafnaði síðan með þrumuskalla eftir hornspyrnu frá Jordon Mutch en Davies varð einmitt fyrir því óláni að skora sjálfsmark í fyrri leiknum.

Blackpool hélt út og fagnaði vel sæti í úrslitaleiknum á Wembley.