Fabio spenntur fyrir því að fara til Benfica

Brasilíski bakvörðurinn hjá Man. Utd, Fabio, er spenntur fyrir því að leika með portúgalska liðinu Benfica á næstu leiktíð. United ætlar að lána leikmanninn næsta vetur.

"Ég þekki vel til Benfica og hef séð marga leiki með liðinu. Félagið er vel þekkt í Brasilíu og á marga stuðningsmenn þar. Þetta er frábært lið og það væri gott fyrir mig að spila með þeim," sagði Fabio sem hefur ekki náð að stimpla sig inn hjá Man. Utd.

"Ég er með portúgalskt vegabréf og tala tungumálið þannig að ég yrði ekki í neinum vandræðum með að aðlagast lífinu í Portúgal."

Fabio hefur aðeins tekið þátt í fimm leikjum með United í vetur.