Charlie Adam missir af bikarúrslitaleiknum gegn Chelsea

Charlie Adam, miðjumaður Liverpool, verður frá það sem eftir lifir tímabilsins vegna hnémeiðsla. Hann mun því missa af bikarúrslitaleiknum gegn Chelsea aðra helgi.

Adam hefur verið frá vegna þessara sömu meiðsla undanfarnar vikur. Meiðslin má rekja til tæklingar Armand Traore í viðureign QPR og Liverpool á Loftus Road í mars.

Kenny Dalglish, knattspyrnustjóri Liverpool, hefur staðfest að Adam þurfi ekki að gangast undir aðgerð en hann myndi ekki spila meira með Liverpool á leiktíðinni. Hann útilokaði um leið þátttöku Skotans í knattspyrnuliði Bretlands á Ólympíuleikunum í sumar að sögn enska vefmiðilsins Sky Sports.

Frammistaða Adam með Liverpool á tímabilinu hefur valdið töluverðum vonbrigðum eftir frábæra frammistöðu með Blackpool á síðustu leiktíð.