Nani vill ólmur skrifa undir langtíma samning við Manchester United

Luis Nani, leikmaður Manchester United, hefur staðfest við enska fjölmiðla að hann sé byrjaður að ræða við forráðamenn félagsins um nýjan langtíma samning við Manchester United.

Nani vill meina að hann hafi enga ástæðu til að yfirgefa Old Trafford og ætlar sér að vera lengi hjá félaginu. Lið á Spáni og Ítalíu hafa mikinn áhuga á þessum snjalla kantmanni og því er mikilvægt fyrir Manchester United að semja sem fyrst við leikmanninn.

„Stjórinn hefur ennþá mikið álit á mér og það er það eina sem skiptir máli," sagði Nani.

„Umboðsmaður minn er byrjaður að ræða við klúbbinn um nýjan samning og það lítur allt vel út."

„Ég vona að undir lok tímabilsins verði nýr samningur komin á borðið og ég mun að öllum líkindum skrifa undir hann."

Nani vill meina að ástæðan fyrir velgengi hans sé knattspyrnustjóri félagsins Alex Ferguson

„Hann er frábær stjóri og að mínu mati sá besti í heiminum. Hann er sérstakur og maður furðar sig oft á honum en ég man eftir nokkrum tilvikum þar sem við unnum leik með þremur mörkum en Ferguson var samt sem áður ekki ánægður. Okkur leið eins og við hefðum tapað leiknum. Maður mótmælir samt aldrei því sem hann segir, það er bara þannig."