Romney vann í sex ríkjum á ofurþriðjudeginum

Mitt Romney hefur verið úrskurðaður sigurvegari í Ohio eftir æsispennandi kosninganótt.

Það var ekki fyrr en nær öll atkvæði höfðu verið talin að ljóst var að Romney hafði sigrað Rick Santorum en aðeins munaði prósentubroti á þeim. Romney hlaut um 38% atkvæða en Santorum rúmlega 37%.

Þar með vann Romney í sex prófkjörum af þeim tíu sem fram fóru á svokölluðum ofurþriðjudegi í gær, það er í Ohio, Vermont, Virginíu, Massachusetts, Idaho og Alaska.

Santorum vann í Tennesse, Oklahoma og Norður Dakóta. Newt Gingrich vann í heimaríki sínu Georgíu.

Úrslitin í Alaska voru kunngerð fyrir skömmu en þar hlaut Romney 35% atkvæða. Ron Paul gerði sér vonir um sigur í Alaska en endaði með 25% atkvæða.