Gyan verður áfram hjá Al Ain

Allt útlit er fyrir að arabíska félagið Al Ain muni kaupa Ganverjann Asamoah Gyan frá Sunderland en hann var í láni hjá fyrrnefnda félaginu á síðustu leiktíð.

Gyan var óvænt lánaður til Al Ain síðastliðið haust eftir að félagið samþykkti að greiða sex milljónir punda fyrir að fá hann að láni.

Gyan stóð sig vel, skoraði 22 mörk á tímabilinu og Al Ain varð meistari. Félagið ákvað því að nýta sér kauprétt á leikmanninum en talið er að Gyan fái um 150 þúsund pund í vikulaun hjá Al Ain.

Forráðamenn Al Ain segja að það sé nánast formsatriði að ganga frá samningum og hrósuðu Gyan fyrir hans framlag til liðsins. „Hann átti ríkan þátt í velgengni okkar á síðasta tímabili og hagaði sér mjög vel, sem skiptir máli í þessum heimshluta," sagði Carlo Nohra, framkvæmdarstjóri félagsins.