Sturridge fékk heilahimnubólgu en er á batavegi

Roberto Di Matteo, stjóri Chelsea, staðfestir að sóknarmaðurinn Daniel Sturridge hafi veikst af heilahimnubólgu um helgina en að hann sé nú á batavegi.

Sturridge er í landsliðshópi Breta fyrir Ólympíuleikana en veiktist skyndilega um helgina. Hann var fluttur á sjúkrahús til aðhlynningar.

„Ég hef rætt við Daniel og honum líður betur í dag," sagði Di Matteo. „Vonandi nær hann sér fljótt og vel."

Tíminn verður að leiða í ljós hvort hann nái fullum bata fyrir Ólympíuleikana. Vírussýking varð valdandi að heilahimnubólgunni og segir í frétt á vef BBC að sjúklingar geti náð bata á tveimur vikum.

Fyrsti leikur Breta á leikunum verður þann 26. júlí næstkomandi en áætlað er að liðið komi saman til æfinga um næstu helgi.