Mancini telur United vera sigurstranglegasta liðið

Keppnistímabilið á Englandi hefst formlega á sunnudaginn þar sem Englandsmeistarar Manchester City mæta bikarmeisturum Chelsea í leik um Samfélagsskjöldinn.

Roberto Mancini, stjóri ensku meistaranna, er byrjaður að setja pressu á aðalkeppinautinn í Manchester United fyrir næstu leiktíð.

„Ég held að United-menn séu líklegastir á næstu leiktíð" sagði Mancini við fréttamenn. „Ég hef mikla trú á mínum mönnum vegna þess að við unnum deildina og einnig vegna þess að við unnum frábært lið United á síðustu leiktíð. En við verðum að bæta okkur á hverju stigi og við erum með ungt lið sem verður að bæta gæðin í hverjum mánuði," sagði Mancini.

Mario Balotelli og David Silva verða að öllum líkindum ekki í byrjunarliði City á sunnudag vegna þess að Mancini vill að þeir fái aðeins meiri hvíld eftir EM í sumar. Þá verður Micah Richards ekki með og enn er um það bil mánuður í að Gareth Barry nái fullri heilsu.

Leikur Manchester City og Chelsea á sunnudag verður sýndur beint á Stöð2 Sport og Sport 2 og hefst útsending klukkan 12.00.