Barton missir sex vikna laun og fyrirliðabandið

Joey Barton missir ekki bara af 12 fyrstu leikjum ensku úrvalsdeildarinnar á næstu leiktíð vegna hegðunar sinnar í lokaumferð ensku úrvalsdeildarinnar því Queens Park Rangers hefur einnig ákveðið að sekta hann um sex vikna laun og taka af honum fyrirliðabandið.

Barton fékk rautt spjald í lokaumferðinni eftir að hafa lent saman við Carlos Tevez hjá Manchester City. Hann hneykslaði síðan alla með því að sparka í Sergio Aguero á leið sinni út af vellinum.

Barton er þegar búinn að tjá sig um málið á twitter-síðu sinni. „Ég var kærulaus og á skilið allar þær refsingar sem ég fæ. Peningar koma og fara og skipta mig ekki máli. Það er hinsvegar sárt að missa fyrirliðabandið og af fyrstu tólf leikjum tímabilsins. Ég hegðaði mér heimskulega en ég er viss um að ég komi sterkur til baka," sagði Joey Barton.