Modric sterklega orðaður við United

Luka Modric, miðjumaður Tottenham og króatíska landsliðsins, er enn á ný orðaður við Manchester United í breska götublaðinu The Sun í dag.

Sir Alex Ferguson, knattspyrnustjóri Manchester United, er talinn tilbúinn að reiða fram 25 milljónir punda eða sem nemur fimm milljörðum íslenskum króna í miðjumanninn.

The Sun telur sig hafa heimildir fyrir því að á borðinu sé fjögurra ára samningur og vikulaun upp á 125 þúsund pund eða sem nemur 25 milljónum króna.

Manchester United gekk á dögunum frá samningi við japanska miðjumanninn Shinji Kagawa frá Borussia Dortmund á 17 milljónir punda. Samkvæmt þessum fréttum telur Ferguson að enn þurfi að styrkja miðjusvæðið en United gekk titlalaust frá borði á síðustu leiktíð.

Þá er reyndar ótalinn Samfélagsskjöldurinn sem aðeins hörðustu stuðningsmenn félagsins nota til að afsaka afrakstur félagsins á síðustu leiktíð.

Modric er við æfingar í Warka í Póllandi en liðið mætir Írum í fyrsta leik sínum á Evrópumótinu í Poznan á sunnudaginn.