Redknapp tekur þátt í EM eftir allt saman - verður í spekingahópi BBC

Harry Redknapp, stjóri Tottenham og sá sem flestir bjuggust við að tæki við enska landsliðinu fyrir EM, verður þáttakandi á Evrópumótinu eftir allt saman. Hann hefur samið við BBC um að vera hluti af spekingahópi BBC á mótinu.

Redknapp var orðaður við landsliðsþjálfarastarfið um leið og Fabio Capello sagði starfi sínu lausu en á endanum var það Roy Hodgson sem fékk starfið og mun því stýra enska landsliðinu á EM í Úkraínu og Póllandi.

Harry Redknapp verður í hópi góðra manna í BBC-stúdíóinu því í spekingahópnum verða einnig Þjóðverjinn Jurgen Klinsmann, Hollendingurinn Clarence Seedorf og David James auk fastamannanna Alan Hansen, Alan Shearer og Lee Dixon. Gary Lineker mun síðan stjórna þættinum.