Wilshere þarf að fara í enn eina aðgerðina - núna á hné

Það ætlar að ganga skelfilega hjá Jack Wilshere að snúa aftur inn á knattspyrnuvöllinn því strákurinn hefur enn á ný fengið slæmar fréttir í endurhæfingu sinni. Wilshere missti af öllu tímabilinu vegna ökklameiðsla en nú er að hann að glíma við meiðsli í hné.

Jack Wilshere er orðinn nokkuð góður af meiðslunum á hægri ökkla en þarf að fara til Svíþjóðar í aðgerð á vinstra hné en hann hefur átt í smá sinavandræðum í hnénu.

Arsenal segir frá þessu á heimasíðu sinni en menn þar á bæ telja það ekki líklegt að þessi aðgerð hafi mikil áhrif á endurkomu Jack Wilshere á næstu leiktíð. Jack Wilshere spilaði 49 leiki með Arsenal tímabilið 2010-11 og það er eins og skrokkurinn hafi hreinlega ekki þolað það.

Jack Wilshere mun æfa undir stjórn læknaliðs Arsenal í sumar en Wilshere varð tvítugur í janúar og á vonandi eftir að ná sér að fullu og eiga farsælan feril í framhaldinu.