Liverpool í viðræður við Martinez

Dave Whelan, eigandi enska úrvalsdeildarfélagsins Wigan, hefur staðfest að knattspyrnustjórinn Roberto Martinez hafi fengið leyfi til að ræða við Liverpool.

Liverpool er að leita sér að knattspyrnustjóra þar sem að eigendur félagsins ráku Kenny Dalglish í gær. „Ég veit ekki nákvæmlega hvenær áætlað er að hann hitti eigendur Liverpool en ég mun þó aldrei standa í vegi fyrir Roberto," sagði Whelan við blaðamann The Times í dag.

Martinez var einn þeirra sem var helst orðaður við stjórastöðuna hjá Liverpool en aðrir hafa einnig verið orðaðir við starfið, svo sem Brendan Rodgers hjá Swansea og Rafa Benitez, sem áður stýrði liðinu.

Liverpool hafnaði í áttunda sæti ensku úrvalsdeildarinnar á nýliðnu tímabili en fagnaði sigri í ensku deildabikarkeppninni. Árangurinn stóðst þó ekki væntingar eigenda Liverpool og því var ákveðið að rifta samningi Dalglish.

Robetro Martinez er 38 ára gamall Spánverji sem hefur þjálfað Wigan með góðum árangri síðan 2009. Þar áður stýrði hann Swansea í tvö ár en hann lék einnig með báðum félögum á sínum tíma. Martinez þykir einn besti ungi knattspyrnustjórinn á Bretlandseyjum í dag.

Martinez kom Swansea upp í ensku C-deildina árið 2008 og tók svo við Wigan sumarið 2009. Hann hefur haldið Wigan uppi í ensku úrvalsdeildinni öll sín þrjú ár þrátt fyrir að það hafi gengið á ýmsu hjá liðinu á þeim tíma.