Solskjær efstur á óskalista Aston Villa

Enskir fjölmiðlar fullyrða í dag að Norðmaðurinn Ole Gunnar Solskjær þyki nú líklegastur til að taka við starfi knattspyrnustjóra hjá Aston Villa.

Alex McLeish var rekinn frá Villa fyrr í vikunni og Randy Learner, bandarískur eigandi félagsins, er nú staddur í Englandi til að finna eftirmann McLeish.

Solskjær átti glæsilegan feril með Manchester United í ensku úrvalsdeildinni þar sem hann var í ellefu ár sem leikmaður. Hann starfaði einnig sem þjálfari varaliðsins áður en hann hélt aftur til Noregs þar sem hann tók við þjálfun Molde.

Solskjær gerði Molde að Noregsmeisturum í fyrsta sinn í 100 ár í fyrra og hefur reglulega verið orðaður við ýmis félög í Englandi.

McLeish var í starfi hjá Villa í aðeins eitt ár en árangur liðsins á nýliðnu tímabili var langt undir væntingum. McLeish var þar að auki aldrei í náðinni hjá stuðningsmönnum liðsins.

Roberto Martinez var einnig sagður ofarlega á óskalista Learner en hann er nú helst orðaður við stjórastöðuna hjá Liverpool.