30 látnir eftir sjálfsmorðsárásir í Sýrlandi

Tvær sjálfsmorðssprengingar áttu sér stað í borginni Damaskus í Sýrlandi í dag. Samkvæmt opinberum fjölmiðlum þar í landi hafa rúmlega 30 manns látið lífið og enn fleiri eru slasaðir. Talið er að liðsmenn hryðjuverkasamtakanna al-Qaeda hafi staðið að baki sprengjuárásinni.

Skotmörk árásanna voru bækistöðvar öryggissveita í Damaskus en miklar skemmtir hlutust af sprengingunum. Samkvæmt fjölmiðlum í Sýrlandi létust bæði hermenn og óbreyttir borgarar í árásinni.

Andspyrnuhópar í Sýrlandi eru þó efins um að al-Qaeda hafi verið að verki segja að stjórnvöld í landinu hafa skipulagt sprengingarnar til að hafa áhrif á sendinefnd Arababandalagsins sem nýlega kom til landsins.

Markmið nefndarinnar er að koma í veg fyrir áframhaldandi átök í Sýrlandi og að tryggja það að stjórnvöld framfylgi samkomulagi um að enda ofbeldi og að frelsa alla þá sem handteknir hafa verið í mótmælunum, en talið er að þeir skipti þúsundum.

Sameinuðu Þjóðirnar telja að rúmlega 5.000 manns hafi fallið í átökum andspyrnuhópa og öryggissveita síðan mótmælin hófust í mars á þessu ári.