Ófarir Arsenal halda áfram - tapaði 4-3 fyrir Blackburn

Ótrúleg úrslit voru í fyrsta leik dagsins í ensku úrvalsdeildinni en þá vann Blackburn 4-3 sigur á Arsenal. Síðarnefnda liðið skoraði tvö sjálfsmörk í leiknum en þetta var fyrsti sigur Blackburn á leiktíðinni.

Gervinho og Mikel Arteta skoruðu sín fyrstu mörk fyrir Arsenal í fyrri hálfleik og var staðan að honum loknum 2-1 fyrir gestina.

Yakubu skoraði mark Blackburn í fyrri hálfleik en snemma í síðari hálfleik varð Alex Song, sem lagði upp mark Gervinho með laglegri sendingu, fyrir því óláni að stýra knettinum í markið af stuttu færi.

Yakubu kom svo Blackburn yfir þegar hann stýrði fyrirgjöf Steven Nzonzi í markið í markteignum en endursýningar sýndu að hann var rangstæður þegar sendingin kom. Markið fékk engu að síður að standa.

Ólán Arsenal var svo algert stuttu síðar þegar að Blackburn komst í skyndisókn. Johan Djourou gerði sig sekan um slæm mistök og Martin Olsson komst upp að endamörkum þar sem hann sendi fyrir markið, beint í Laurent Koscielny sem varð að horfa á eftir knettinum í eigið net.

Varamaðurinn Marouane Chamakh náði svo að minnka muninn fyrir Arsenal með fínu skallamarki eftir sendingu Robin van Persie. Þetta var fyrsta mark Chamakh á árinu og fagna því sjálfsagt margir.

Leikmenn Arsenal sóttu nokkuð stíft á lokamínútunum en allt kom fyrir ekki. Liðið er því með fjögur stig eftir fimm leiki og því enn í neðri hluta deildarinnar.

Gervinho lék í dag sinn fyrsta leik eftir að hafa tekið út leikbann og Andre Santos lék sinn fyrsta leik með Arsenal en hann var keyptur í lok síðasta mánaðar.

Blackburn vann í dag sinn fyrsta sigur á tímabilinu og var stjóri liðsins, Steve Kean, sjálfsagt manna fegnastur í leikslok en hann hefur verið sagður afar valtur í sessi. Fyrir leikinn fóru stuðningsmenn Blackburn í mótmælagöngu og kröfðust þess að hann yrði rekinn frá félaginu.