Fjölskylda Tevez flutt til Manchester

Roberto Mancini, stjóri Manchester City, telur líklegt að Carlos Tevez verði um kyrrt hjá félaginu og leiki með því í vetur.

Tevez vill fara frá Manchester en Mancini hefur þegar fullyrt að það sé ekkert félag sem hafi efni á honum.

Hann var þó nálægt því að ganga til liðs við Corinthians í Brasilíu í sumar en ekkert varð af því.

„Fjölskyldan hans er komin hingað. Nú þegar hún er komin hingað tel ég að hann geti verið áfram hjá okkur,“ sagði Mancini en ein helsta ástæðan fyrir því að Tevez var sagður vilja fara frá Manchester var sú að hann saknaði dætra sinna heima í Argentínu.

„Þetta er jákvætt skref fyrir félagið. Carlos er einn besti leikmaður liðsins.“

Tevez fékk lengra sumarfrí vegna Copa America-keppninnar í sumar. Af þeim sökum hefur hann lítið spilað með City á tímabilinu til þessa.