Dalglish: Vinnusemin skilaði sigrinum

Kenny Dalglish, stjóri Liverpool, segir að samstaða leikmanna og vinnusemi þeirra í leiknum gegn Bolton í dag hafi verið lykillinn að 3-1 sigri Liverpool.

„Það var frábært að fylgjast með þessum leik,“ sagði Dalglish. „Við unnum leikinn vegna þess að við lögðum mikið á okkur og unnum saman.“

„Maður kannski leyfir sér að vera í smá fýlu út af þessu marki sem við fengum á okkur undir lokin en við dvöldum ekki lengi við það. Það segir einnig sitt.“

Owen Coyle, stjóri Bolton, segir sína menn hafa byrjað ágætlega í leiknum.

„En svo kom Jordan Henderson og sýndi af hverju Liverpool borgaði 20 milljónir punda fyrir hann. Hann kláraði færið mjög vel.“

„Svo skutum við okkur í fótinn í upphafi seinni hálfleiks með því að fá þessi tvö mörk á okkur.“