Ferguson: Múgæsingur í fjölmiðlum gegn de Gea

Sir Alex Ferguson, knattspyrnustjóri Manchester United, tekur upp hanskana fyrir markverði liðsins David de Gea og mun Spánverjinn byrja milli stanganna gegn Chelsea í dag.

Ferguson segir að sú neikvæða mfjöllun sem markvörðurinn hefur fengið á sig á tímabilinu eigi ekki rétt á sér.

Þessi 20 ára markvörður kom til Manchester United fyrir tímabilið frá spænska félaginu Atletico Madrid.

„Það hefur myndast ákveðin múgæsingur gegn de Gea í fjölmiðlum og það er fáránlegt,“ sagði Ferguson.

„Ég tók eftir þessu á miðvikudagskvöldið þegar við lékum í Meistaradeild Evrópu, en þá var líkt og fjölmiðlar vildu að de Gea myndi valda okkur vonbrigðum og standa sig illa “.

„Hann verður í liðinu gegn Chelsea á sunnudaginn og það hafði ég ákveðið fyrir löngu“.

„Þessi strákur talar ekki ensku og er að læra fullt af nýjum hlutum auk þess sem hann er aðeins tvítugur, en hann hefur þurft að ganga í gegnum margt frá því að hann kom til Englands“.

„Við erum með tvo frábæra markverði og þeir verða að berjast um stöðuna, en í dag er de Gea okkar aðalmarkvörður“.