Mertesacker er á leiðinni til Arsenal

Joachim Low, landsliðsþjálfari Þýskaland, hefur gefið varnarmanninum, Per Mertesacker, leyfi til að ferðast til London til að ganga frá samningi við enska knattspyrnufélagið Arsenal.

Mertesacker var staddur með þýska landsliðinu við æfingar þar sem liðið undirbýr sig fyrir landsleiki í undankeppni Evrópumótsins árið 2012.

Mertesacker er virkilega öflugur varnarmaður sem hefur verið hjá Werder Bremen frá árinu 2006 og mun styrkja Arsenal mikið.

„Per hringdi í mig seint í gær og sagði mér frá málinu,“ sagði Low við þýska fjölmiðla.

„Ég sagði við leikmenn liðsins að hann fengi einn dag til að ganga frá málinu“.

Talið er að Arsenal þurfi að greiða 9 milljónir punda fyrir leikmanninn, en hann er samkvæmt enskum fjölmiðlum staddur í læknisskoðun þessa stundina hjá Arsenal.