Moyes sakar leikmenn Blackburn um leikaraskap

David Moyes, stjóri Everton, segir að leikmenn Blackburn hafi látið sig detta í bæði skiptin sem liðið fékk vítaspyrnu í dag.

Blackburn skoraði reyndar úr hvorugri spyrnunni og Everton vann að lokum 1-0 sigur - með marki úr vítaspyrnu í uppbótartíma.

„Þetta var leikaraskapur í bæði skiptin. Þeir létu sig detta,“ sagði Moyes við enska fjölmiðla eftir leikinn. „Dómarinn hafði rangt fyrir sér í tvígang í okkar vítateig en rétt fyrir sér í vítateignum þeirra.“

„Þetta voru frábær þrjú stig. Blackburn tapar ekki mörgum leikjum á heimavelli og sýnir árangur síðustu ára einmitt það. Það var því mjög gott að koma hingað og vinna þrjú stig.“