Lambert: Áttum ekki skilið að tapa

Paul Lambert, stjóri Norwich, segir að sínir menn hefðu ekki átt skilið að tapa fyrir Chelsea í leik liðanna í dag.

Norwich lenti undir snemma leiks í dag en náði sér á strik og jafnaði leikinn í upphafi síðari hálfleiks.

Liðið var síst lakari aðilinn eftir þetta, þar til að John Ruddy markvörður tók niður Ramires í eigin vítateig. Hann fékk rautt og vítaspyrna var dæmd sem Frank Lampard skoraði úr.

Juan Mata innisiglaði svo sigurinn fyrir Chelsea í uppbótartíma.

„Ég er afar stoltur af mínum mönnum,“ sagði Lambert. „Mér fannst þetta frábær frammistaða og mér fannst við eiga meira skilið en við fengum.“

„Mér fannst sjálfstraustið aukast eftir því sem leið á leikinn og við spiluðum á köflum virkilega vel. Frammistaðan var góð en niðurstaðan er tap.“

Hann segir að vítaspyrnudómurinn hafi verið vendipunktur leiksins. „Ég er búinn að sjá atvikið aftur og mér finnst hann á niðurleið, jafnvel áður en hann nær að snerta boltann. Það er alveg ljóst að svona atvik eru ekki dæmd okkur í hag í leikjum sem þessum.“