Hver er þessi Dominique Strauss-Kahn?

Dominique Strauss-Kahn, framkvæmdastjóri Alþjóðagjaldeyrissjóðsins, mun neita því að hafa framið kynferðisbrot gegn hótelþernu þegar að hann verður færður fyrir dómara í dag. Þetta segja verjendur hans í samtali við CNN. Hann var handtekinn í gær vegna meints brots og ákærður í morgun.

Alþjóðagjaldeyrissjóðurinn hefur verið töluvert mikið til umfjöllunar á Íslandi frá bankahruni. Þá ákváðu Íslendingar að leita hjálpar hjá sjóðnum. Þennan tíma hefur Strauss-Kahn farið fyrir Alþjóðagjaldeyrissjóðnum. En hver er þessi maður?

• Hann er 61 árs gamall.
• Hann er fæddur í Frakklandi, en var að hluta til alinn upp í Marokkó. Hann var stúdent við HEC skólann í París og síðar við Sciences Po háskólann í Frakklandi.
• Hann er tvískilinn, en er nú giftur Anne Sinclair, virtum blaðamanni í Frakklandi.
• Hann er fyrrverandi viðskiptaráðherra og fjármálaráðherra í Frakklandi. Hann á stóran heiður af þeirri aðferðafræði sem notuð var þegar franskt efnahagslíf var endurreist í lok tíunda áratugar síðustu aldar. Þá vann hann að því að snarminnka skuldir ríkissjóðs Frakklands og einkavæddi opinberar stofnanir og fyrirtæki.
• Hann vék úr ríkisstjórn árið 1999 vegna ásakana um spillingu. Hann var síðar sýknaður af slíkum ásökunum fyrir dómi.
• Hann sóttist eftir því að vera útnefndur forsetaframbjóðandi sósíalista árið 2006, en hlaut ekki útnefningu.
• Hann hefur síðan gegnt lykilhlutverki í baráttunni við alheimskreppuna sem yfirmaður Alþjóðagjaldeyrissjóðsins allt frá árinu 2007.

Heimild: Aftenposten