Leikir dagsins í enska boltanum: Öll toppliðin að spila

Það fara fimm leikir fram í ensku úrvalsdeildinni í dag og öll þrjú efstu liðin eru að spila. Efstu tvö liðin, Chelsea og Manchester United, eiga bæði útileiki en Arsenal sem er í 3. sæti er á heimavelli á móti Sunderland.

Everton-Man Utd (Klukkan 12.45)

Manchester United getur náð efsta sætinu með sigri og sett pressu á Chelsea sem spilar seinna í dag. United er taplaust í síðustu átta leikjum og hefur náð í 20 stig af síðustu 24 mögulegum. Eveton hefur einnig verið að spila vel en liðið hefur unnið 4 af síðustu fimm leikjum og þar á meðal 2-1 sigur á Chelsea á dögunum. Everton hefur ekki náð að vinna Manchester United í síðustu níu innbyrðisleikjum liðanna.

Arsenal-Sunderland (Klukkan 15.00)

Sunderland hefur aldrei unnið útileik á móti Arsenal því liðið hefur tapað sex leikjum og gert tvö jafntefli í átta heimsóknum. Sunderland vann samt fyrri leik liðanna á tímabilinu 1-0 og hefur ekki tapað í síðustu þremur innbyrðisleikjum liðanna. Sunderland hefur hinsvegar ekki unnið deildarleik síðan að liðið vann Arsenal því liðið hefur síðan gert 6 jafntefli og tapað 6 sinnum í tólf deildarleikjum. Arsenal tapaði fyrir Porto í Meistaradeildinni í vikunni en "Skytturnar" hafa aðeins skorað 2 mörk í síðustu fjórum leikjum.

West Ham-Hull (Klukkan 15.00)

Þetta er sex stiga leikur í fallbaráttunni en bæði lið eru með 24 stig og aðeins einu stigi frá fallsæti. Hull hefur aðeins unnið 1 af síðustu 12 deildarleikjum sínum en West Ham hefur ekki gengið mikið betur með 1 sigur í síðustu 6 leikjum. West Ham er samt tveimur sætum ofar aðeins þökk sé betri markatölu. Hull hefur ekki unnið á Upton Park síðan í janúar 1990.

Wolves-Chelsea (Klukkan 15.00)

Chelsea hefur unnið þrjá síðustu deildarleiki sína á móti Wolves og skorað í þeim fjórtán mörk. Chelsea tapaði síðasta deildarleik sínum á móti Everton og ef að liðið tapar í dag væri það í fyrsta sinn í 141 leik þar sem liðið tapar tveimur deildarleikjum í röð. Wolves hefur aðeins unnið einn af síðustu fjórum leikjum og liðið er aðeins einu stigi frá fallsæti. Chelsea vann fyrri leik liðanna í vetur 4-0 þar sem Michael Essien skoraði tvö mörk og þeir Florent Malouda og Joe Cole voru með eitt mark hvor.

Portsmouth-Stoke (Klukkan 17.30)

Portsmouth hefur ekki unnið í síðustu sjö deildarleikjum og sitja á botni deildarinnar átta stigum á eftir næsta liði. Stoke-liðið hefur spilað vel að undanförnu og hefur ekki tapað í síðustu sex leikjum. Stoke hefur aftur á móti ekki tekist að vinna í síðustu fimm heimsóknum sínum á Fratton Park. Portsmouth vann 4-0 sigur á Stoke í deildarbikarnum fyrr á tímabilinu en Richard Fuller tryggði Stoke 1-0 sigur í fyrri deildarleik liðanna.