Tekur Mark Hughes við Hull?

Samkvæmt heimildum BBC er Hull með fimm nöfn á óskalista sínum yfir næsta knattspyrnustjóra. Meðal manna á listanum er Mark Hughes, fyrrum stjóri Manchester City og Blackburn.

Ian Dowie, fyrrum stjóri QPR, er einnig á listanum. Adam Pearson, stjórnarformaður Hull, vonast til að geta tilkynnt um nýjan stjóra á morgun en Phil Brown var látinn fara í fyrrakvöld.

Alan Curbishley hefur verið orðaður við starfið en Pearson gaf það út í gær að hann kæmi ekki til greina. Samkvæmt veðbönkum er Gary Megson, fyrrum stjóri Bolton og WBA, líklegastur til að taka við en Pearson vill ekkert gefa út um hvort hann komi til greina.