Pulis vill sjónvarpstækni í dómgæslu - myndband

Tony Pulis, stjóri Stoke City, var eðlilega hundóánægður með dómgæsluna í leik sinna manna gegn Sunderland í gær.

Í stöðunni 1-0 fyrir Sunderland átti Kenwyne Jones skalla að marki sem Lee Cattermole, leikmaður Sunderland, virtist verja með hendi á marklínu og jafnvel er talið að boltinn hafi verið kominn inn fyrir línuna.

En hvorki víti né mark var dæmt og Sunderland vann að lokum leikinn, 2-0. Samantekt úr leiknum má sjá hér.

„Ég hef séð endursýningar af þessu og dómarinn er með gott sjónarhorn," sagði Pulis eftir leikinn. „Ég er hlynntur því að nota tæknina í dómgæslu. Það ætti að vera hægt að fram á tvisvar í hvorum hálfleik að leikurinn verði stöðvaður til að skoða atvik í sjónvarpi."

„Ekki oftar því þá væri leikurinn alltaf að stöðvast. Það má ekki draga úr flæði leiksins."