Liverpool og Reading skildu jöfn

Liverpool byrjaði nýja árið ekki með neinni flugeldasýningu er liðið sótti Reading heim í þriðju umferð ensku bikarkeppninnar.

Það mátti vart sjá í leiknum hvort liðið væri í efri hluta úrvalsdeildar og hvort liðið væri í neðri hluta 1. deildarinnar.

Það var Reading sem náði forystunni með marki Simon Church á 24. mínútu. Liverpool jafnaði tólf mínútum síðar og var nokkur heppnisstimpill á því marki.

Gerrard gaf boltann í teiginn þar sem Kuyt virtist vera rangstæður en var það nú samt ekki. Kuyt hitti ekki boltann sem sigldi engu að síður í hornið.

Leikurinn var annars fjörugur og skemmtilegur. Reading síst lakari aðilinn en bæði lið fengu ágætis færi til þess að skora en allt kom fyrir ekki. Liðin þurfa því að mætast á nýjan leik.

Gylfi Þór Sigurðsson, Brynjar Björn Gunnarsson og Ívar Ingimarsson voru allir í byrjunarliði Reading og stóðu sig með miklum sóma.