Mancienne magnaður á miðjunni

Mick McCarthy, knattspyrnustjóri Wolves, hrósar Michael Mancienne í hástert. Þessi 22 ára leikmaður er hjá Úlfunum á lánssamningi frá Chelsea og var upphaflega fenginn til að leika í vörninni.

McCarthy hefur hinsvegar notað Mancienne að undanförnu sem djúpan miðjumann með góðum árangri. Liðið er nú sex stigum fyrir ofan fallsæti.

„Michael hefur verið frábær. Við vitum að hann er góður leikmaður. Hann er miðvörður en hefur fundið sig vel á miðjunni. Hann er að taka framförum og býr yfir miklum hæfileikum," sagði McCarthy.

„Það er mikill kostur að geta spilað fleiri en eina stöðu. Hann getur spilað vel bæði sem miðvörður og miðjumaður. Það gefur honum aukna möguleika."