Ferguson: Ég notaði Rooney ekki rétt á síðasta tímabili

Sir Alex Ferguson, stjóri Manchester United, hefur viðurkennt það að hann notaði Wayne Rooney ekki rétt á síðasta tímabili. Ástæðan var að Rooney vill bara spila og er tilbúinn að vera hvar sem er á vellinum svo framarlega sem hann er inn á vellinum.

Wayne Rooney og félgaar í Manchester United mæta hans gömlu félögum í Everton á Goodison Park í hádegisleik ensku úrvalsdeildarinnar í dag.

„Við notuðum hann ekki rétt á síðasta tímabili. Við notfærðum okkur ákafa hans og áhuga til að fá að spila. Við þekkjum hans styrkleika og hvar hann er bestur og hann er að spila þar sem hann er bestur á þessu tímabili," sagði Sir Alex Ferguson.

„Við tölum oft um að leikmenn séu í heimsklassa og það er ofnotuð samlíking í mörgum tilfellum. Það er samt ekki hægt að segja annað en að Rooney hafi sannað sig sem heimsklassa leikmann á síðustu vikum," segir Ferguson.

„Ég hef alltaf sagt við hann að ef hann ætlar að verða framherji í heimsklassa þá þarf hann að skora reglulega. Hann er núna búinn að skora 25 mörk á tímabilinu og á enn eftir 14 eða 15 leiki, jafnvel fleiri ef vel gengur í Evrópu. Hann er ekki bara frábær leikmaður hann er líka frábær markaskorari," sagði Ferguson.