Ferguson: Engin ástæða til þess að örvænta

Knattspyrnustjórinn Sir Alex Ferguson hjá Englandsmeisturum Manchester United er sannfærður um að lið sitt muni koma sterkt til baka eftir heldur óvænt tap gegn Everton á Goodison Park-leikvanginum um helgina.

Þetta var sjötta tap United í deildinni en liðið fær West Ham í heimsókn á Old Trafford-leikvanginn annað kvöld.

„Deildin er búin að vera galopin og toppliðin hafa verið að tapa talsvert af stigum. Það getur því enn allt gerst í þessarri deild og það er engin ástæða til þess að örvænta.

Við eigum mjög mikilvægan leik framundan á þriðjudagskvöld og vonandi náum við fram hagstæðum úrslitum úr honum," segir Ferguson í viðtali á opinberri heimasíðu United en félagið er sem stendur fjórum stigum á eftir toppliði Chelsea og eiga bæði lið eftir að leika ellefu leiki.