Rooney: Frúin heima með barnið

Rio Ferdinand, fyrirliði enska landsliðsins, segir að eiginkonur og unnustur leikmanna hafi haft truflandi áhrif á síðustu stórmótum. Wayne Rooney, samherji hans hjá Englandi og Manchester United, tekur undir þetta.

„Það á ekkert að banna þeim að koma og styðja okkur. Síðast vorum við öll saman á hóteli og það var hinsvegar vandamál. Konan mín var að eignast barn og hún fer ekkert í sumar," sagði Rooney.

Miklar væntingar eru gerðar til enska landsliðsins fyrir heimsmeistaramótið í sumar sem fer fram í Suður-Afríku. „Við erum að fara til Suður-Afríku til að taka þátt í móti, ekki fara í frí," sagði Fabio Capello, þjálfari Englands.

Ferdinand segir að síðasta heimsmeistaramót hafi minnt sig á fjölleikahús en þá var eiginkonum og fjölskyldum leikmanna boðið með þeim. „Það var eins og heljarinnar sýning væri í gangi kringum enska hópinn. Þetta var eins og á frumsýningu í leikhúsi og fótboltinn var í aukahlutverki," sagði Ferdinand.

„Þú ert að taka þátt í stórmóti og þú gerir það ekki oft á þínum ferli. Til að eiga sem mestan möguleika verður að sýna einbeitingu. Að hafa bæði fjölskylduna og ljósmyndarana kringum sig var of mikið."