Enn breytingar í vændum hjá QPR - Matthaus orðaður við félagið

Daily Mail kveðst hafa heimildir fyrir því að enska b-deildarfélagið QPR sé enn og aftur að huga að breytingum og að staða knattspyrnustjórans Mick Harford hangi nú á bláþræði.

Blaðið greinir frá því að Lothar Matthaus sé líklegur arftaki Harford en Þjóðverjinn sást nýlega sitja við hlið eigandans Flavio Briatore á leik QPR og Ipswich.

Fari svo að Matthaus taki við liðinu yrði hann fjórði stjórinn til að stýra liðinu á þessarri leiktíð en á undan Harford voru Jim Magilton og Paul Hart búnir að reyna sitt til þess að bjarga liðinu sem er nú í 17. sæti deildarinnar, aðeins tveimur stigum frá fallsæti.

Matthaus hefur stoppað víða við á tæplega tíu ára þjálfaraferli sínum og stýrt félagsliðinum Rapid Vín, Partizan Belgrad, Atletico Paranaense, Red Bull Salzburg og Maccabi Netanaya ásamt því að hafa verið landsliðsþjálfari Ungverjalands.