Ferguson heldur upp á 24 ára starfsafmæli í dag

Þann 6. nóvember árið 1986 var Alex Ferguson ráðinn knattspyrnustjóri Manchester United og heldur hann því upp á 24 ára starfsafmæli í dag.

United mætir Wolves í ensku úrvalsdeildinni í dag og er óvíst hvort að Ferguson geti mætt á leikinn þar sem hann hefur verið með flensu í vikunni.

Mike Phelan, aðstoðarmaður hans, á þó von á að Ferguson láti sjá sig í dag en hann hrósaði Ferguson á þessum tímamótum.

„Þetta er frábært afrek og einstakt," sagði Phelan sem kom fyrst til United sem leikmaður árið 1989. Tíu árum síðar hóf hann störf sem þjálfari og er nú aðstoðarmaður Ferguson í dag.

„Ég hef verið það heppinn að hafa verið hjá félaginu í mörg af árum hans hér. Þegar ég byrjaði var ég enn með hár - og yfirvaraskegg."

„Hann á allt það hrós skilið sem hann fær. Hann hefur enn mikið fram að færa vegna þess að hann er mjög góður í að aðlagast nýjum aðstæðum hverju sinni."

„Það er eitt af hans leyndarmálum. Hann er opinn fyrir nýjum hugmyndum og að breyta hlutum - liðum og leikmönnum."