Patrick Vieira: Vill frekar búa í Englandi en á Ítalíu eða í Frakklandi

Patrick Vieira, miðjumaður Manchester City, líður langbest í Englandi af þeim löndum sem hann er búið í á ævinni. Vieira, sem er Frakki, segir andrúmsloftið í Englandi vera afslappaðra heldur en sunnar í álfunni.

„Í okkar starfi þá tel ég að það ég auðveldast að aðlagast lífinu í Englandi. Við getum farið á markaðinn, farið í bíó eða út á bar án þess að einhver trufli okkur," sagði Patrick Vieira á heimasíðu Manchester City.

„Það er möguleiki fyrir fótboltamenn að lifa eðlilegu lífi í Englandi. Ég vil frekar búa í Englandi en á Ítalíu eða í Frakklandi og ég hef líka heyrt á mönnum að það sé betra að vera þar en á Spáni. Þetta er besti staðurinn til að búa," sagði Vieira sem hefur spilað í Cannes, í Mílanó, Lundúnum, í Tórínó, aftur í Mílanó og nú í Manchester-borg.

Patrick Vieira segist hafa hitt stuðningsmenn beggja Manchester-liðanna og að hann hafi rætt við þá um fótbolta. "Það hafa allir verið almennilegir. Stuðningsmennirnir elska fótbolta og þeir elska sitt lið," sagði Vieira.