Ég reyndi að fá Eið Smára til Swansea - „af hverju ekki?“

Brendan Rodgers, stjóri Swansea, staðfesti að hann reyndi að fá Eið Smára Guðjohnsen frá Stoke City.

Eins og fjallað var um á Vísi í gær reyndi Rodgers að fá Eið Smára að láni frá Stoke City, þar sem hann hefur lítið sem ekkert fengið að spila að undanförnu.

Hann reyndi einnig að fá Daniel Sturridge frá Chelsea og Carlos Vela frá Arsenal en tókst ekki. Hann þurfti að sætta sig að fá Jermaine Easter MK Dons en lokadagur félagaskipta lánsleikmanna var í gær.

„Ég þekki Eið Smára vel," sagði Rodgers sem starfaði sem þjálfari hjá Chelsea á sama tíma og Eiður Smári lék með félaginu. „Hann hefur ekki verið að spila með Stoke og kannski þurfti hann að fá að spila. Af hverju ekki?"

„En Tony [Pulis, stjóri Stoke] vildi ekki leyfa fleiri leikmönnum fara því hann er bara með 20 leikmenn í leikmannahópnum."

Eiður Smári hefur ekkert fengið að spila með aðalliði Stoke í nóvember en liðið mætir Manchester City á laugardaginn.