Segja 257 hafa fallið á Srí Lanka

Fulltrúar uppreisnarmanna Tamíltígranna á Srí Lanka saka stjórnarher landsins um að hafa stráfellt almenna borgara í loftárásum á átakasvæði í norðurhluta landsins í nótt. Á vefsíðu tígranna í morgun segir að 257 almennir borgarar hafi fallið í árásunum og 814 særst.

Talsmaður hersins segir hins vegar alrangt að loftárásir hafi verið gerðar í nótt.

Ásakanir um grimmdarverk hafa gengið milli tígranna og stjórnarhersins síðan átök blossuðu upp aftur eftir að vopnahléssamkomulagi milli stríðandi fylkinga var sagt einhliða upp af stjórnvöldum.

Illa gengur að fá þær ásakanir staðfestar af óháðum fulltrúum þar sem starf alþjóðlegra hjálparsamtaka er takmarkað á bardagasvæðinu og erlendum fjölmiðlum bannað að senda fréttamenn þangað.