Farþegar yfirbuguðu sprengjumann

Tilraun var gerð til að sprengja upp farþegaþotu með tæplega þrjú hundruð manns innanborðs skömmu fyrir lendingu í Detroit í Bandaríkjunum í gær. Farþegum tókst að yfirbuga mann sem hafði vafið sprengjuefni um fætur sér. Eftirlit með farþegum til Bandaríkjanna hefur verið hert og má hver einasti farþega á leið þangað búast við líkamsleit.

Flugvél Delta flugfélagsins með 278 farþega og ellefu manna áhöfn innanborðs átti eftir um tuttugu mínútur til lendingar í Detroit í gær, þegar farþegar heyrðu hvell og reykur myndaðist við sæti farþega í flugvélinni. Nokkrir farþeganna brugðust skjótt við og yfirbuguðu manninn en í hamaganginum óðu þeir yfir sæti og aðra farþega til að yfirbuga manninn.

Maðurinn var síðan leiddur fremst í flugvélina með logandi buxnaskálmar og mikið brunninn á fótleggjum. Flugliðar náðu að slökkva eldinn með handslökkvitæki. Maðurinn sem um ræðir er sagður heita Farouk Abdul Mutallab, tuttugu og þriggja ára Nígeríumaður. Talið er að hann hafi stundað verkfræðinám í Bretlandi. Líklegt er að hann hafi flogið með KLM flugfélaginu frá Lagos í Nígeríu til Amsterdam í gær þar sem hann hélt svo áfram með flugvél Delta flugfélagsins til Detroit.

Lögregla segir að hann hafi verið með þróaðan sprengibúnað límdan við fætur sér, sem samanstóð af púðri og ótilgreindum vökva. Hann hafi síðan reynt að gera sprengiefnið virkt með því að blanda vökvanum við púðrið.

Eftir lendingu lýstu farþegar því hvernig skelfing braust út á meðal þeirra. Maðurinn hafi öskrað hástöfum að hann væri liðsmaður al-Quaida. Sumir farþeganna sögðu að þeir hafi óttast að lífi þeirra væri lokið.

Mikill viðbúnaður var þegar flugvélin lenti farsællega á flugvellinum í Detroit. Barack Obama forseti Bandaríkjanna sem var í jólaleyfi með fjölskyldu sinni á Hawai setti sig þegar í samband við Þjóðaröryggisráðið og Heimavarnarráðuneytið.

Tilræðismaðurinn brenndist mjög illa á fótum og er nú á sjúkrahúsi undir eftirliti lögreglu.