Loftbelgjaforeldrar dæmdir til að greiða himinháa sekt

Blöðruforeldrarnir Richard Heene og eiginkona hans, Mayumi, hafa verið dæmd til þess að greiða 42 þúsund dollara í sekt fyrir smekklausan hrekk.

Þau hringdu í lögregluna og lugu að þeim að sonur þeirra væri fastur í lofbelg sem sveif yfir Colarado í Bandaríkjunum. Mikill viðbúnaður varð vegna málsins enda talið að tíu ára sonur þeirra, Falcon, væri fastur í loftbelgnum.

Í ljós kom að um gabb var að ræða og drengurinn hafði verið í felum allan tímann vegna þess að faðir hans skipaði honum að gera það.

Richard ætlaði sér að auglýsa hugmynd að veruleikaþætti sem snérist um svipuð göbb. Málið vakti ótrúlega hneykslun í Bandaríkjunum og víðar og hlaut uppátæki heimsathygli.

Yfirvöld voru æf vegna lyga foreldranna og kærðu þau fyrir athæfið. Ljóst er að hjónin þurfa að greiða 42 þúsund dollara, sem var kostnaður vegna björgunaraðgerðanna, en það á enn eftir að kveða upp dóm yfir þeim. Búist er við að þau sleppi með skilorðsbundinn dóm.

Hjónin hafa þegar sagt við fjölmiðla að þau hafi ekki efni á að greiða sektina.