Notts County rekur knattspyrnustjórann

Enska D-deildarfélagið Notts County hefur ákveðið að segja Ian McParland upp störfum en hann var knattspyrnustjóri liðsins.

McParland hafði stýrt liðinu í tæp tvö ár en mikil óvissa hefur verið um framtíð hans frá félaginu síðan að nýir eigendur yfirtóku félagið í sumar.

Sven-Göran Eriksson er yfirmaður knattspyrnumála hjá félaginu og mun ekki taka að sér starf knattspyrnustjóra. Hann mun þvert á móti sjá um að finna nýjan mann í starfið.

Afar lítið er vitað um eigendur Notts County og viðurkenndi Eriksson sjálfur í viðtali við enska fjölmiðla um helgina að hann sjálfur hefði aldrei hitt mennina sem borga reikninga félagsins.

Notts County er nú langríkasta félag ensku D-deildarinnar en liðið er sem stendur í fimmta sæti, fjórum stigum á eftir toppliði Bournemouth.