Everton hefur áhuga á japönskum landsliðsmanni

Miðjumaðurinn Keisuke Honda hefur vakið mikla athygli fyrir spilamennsku sína með VVV Venlo í hollensku úrvalsdeildinni en þessi 23 ára landsliðsmaður Japan er orðaður við fjölda félaga, meðal annars á Englandi.

Knattspyrnustjórinn David Moyes hjá Everton er sagður tilbúinn að borga 3 milljónir punda fyrir leikmanninn þegar félagaskiptaglugginn opnar í janúar. Moyes er sagður sjá Honda sem kjörinn mann til þess að leysa af hólmi hinn meidda Mikel Areta sem verður frá vegna meiðsla stærstan part yfirstandandi keppnistímabils.

Everton gæti þó fengið samkeppni frá PSV, Ajax og jafnvel grönnum sínum í Liverpool.