Faðir hryðjuverkamanns varaði bandarísk yfirvöld við syni sínum

Faðir sprengjuvargs sem reyndi að granda farþegaþotu sem var á leiðinni frá Hollandi til Bandaríkjanna á föstudaginn segist hafa varað yfirvöld í Bandaríkjunum og Nígeríu við öfgakenndum skoðunum sonar síns.

Það var á föstudaginn sem Umar Farouk Abdul Mutallab reyndi að granda þotunni en um borð voru 300 farþegar. Ætlunin mistókst en farþega og starfsfólki tókst að yfirbuga Umar eftir að hann hafði kveikt á sprengjunni sem var samansett af púðri og ótilgreindum vökva. Það vildi þó ekki betur til en að eldur læsti sig í Umar og er hann illa brunninn á fótleggjum eftir árásina.

Faðir Umars, Alhaji Umaru Mutallab, er virtur borgari í Nígeríu en hann er meðal annars fyrrverandi ráðherra þar í landi auk þess sem hann situr í stjórn banka. Fyrir hálfu ári síðan fór að hann sjá róttækar hliðar á syni sínum og óttaðist hann að sonur sinn væri tilbúinn að fremja hryðjuverk. Hann reyndi þá að vara yfirvöld í Nígeríu og Bandaríkjunum við syni sínum. Í nígerískum fjölmiðlum segir að Umar hafi meðal annars boðað herskáa Íslam trú í háskóla í London þar sem hann nam verkfræði.

Á meðal vina var Umar kallaður „Alfa" sem er slangur yfir íslamskan lærimeistara.

Faðir Umars segist vera hneykslaður á því að sonur hans hafi yfirhöfuð fengið að fljúga til Bandaríkjanna þrátt fyrir viðvaranir hans. Þá segir hann einnig að Umar hafi slitið öll tengsl við fjölskyldu sína fyrir rúmlega hálfu ári síðan.

Talið er að Umar tengist Al Qaeda samtökunum.