Gott að fá tækifæri til að spila án Rooney

Frank Lampard segir að það sé hollt fyrir enska landsliðið að sjá hvernig það muni spjara sig án Wayne Rooney sem mun missa af leik Englands og Hvíta-Rússlands á morgun.

Rooney meiddist í leiknum gegn Úkraínu um helgina en England hefur þegar tryggt sér sæti í úrslitakeppni HM sem fer fram í Suður-Afríku á næsta ári. Leikurinn annað kvöld hefur því litlu meiri þýðingu fyrir Englendinga en æfingaleikur.

„Wayne er mjög góður leikmaður og hefur verið að standa sig frábærlega. Hann er án nokkurs vafa búinn að vera besti leikmaður okkar í undankeppninni," sagði Lampard í samtali við enska fjölmiðla. „En það verður gott að sjá hvernig við munum spjara okkur án hans. Það hafa verið leikmenn á hliðarlínunni að bíða eftir sínu tækifæri og það verður jákvætt fyrir okkur ef þeir fá tækifæri til að sýna sig og sanna."