Robinho til í að fara til Barcelona

Brasilíumaðurinn Robinho, leikmaður Manchester City, segir að hann geti vel ímyndað sér að spila með Barcelona einn daginn.

„Auðvitað væri ég til í að spila með Barcelona. Hver myndi ekki vilja spila með liðinu? Það væri frábært að fá að spila með mönnum eins og Messi, Dani Aleves, Xavi, Ibrahimovic, Iniesta og öllum hinum,“ sagði hann.

„Barcelona er með frábært lið. Ég hef spilað gegn því áður og veit hversu sterkt það er. En eins og er get ég bara spilað við Barcelona í PlayStation,“ bætti hann við.

Hann sagði að þar til að City fær tilboð í sig frá Barcelona muni hann einbeita sér að því að spila með City.

Mark Bowen, aðstoðarknattspyrnustjóri City, segir þó að Robinho geti ekki labbað beint inn í byrjunarliðið þegar hann verður orðinn heill af meiðslum sínum.

Hann meiddist í 3-1 sigri brasilíska landsliðsins á því argentínska í upphafi síðasta mánaðar og hefur ekkert geta spilað síðan þá.

Craig Bellamy hefur verið síðan þá skorað fjögur mörk í jafn mörgum deildarleikjum.

„Robi er ekkert frábrugðinn öðrum leikmönnum. Hann mun þurfa að berjast fyrir sínu sæti í byrjunarliðinu þegar hann kemst aftur í gott form," sagði Bowen í samtali við enska fjölmiðla.

„Margir velta því kannski fyrir sér hvernig Robi eigi að koma sér aftur í liðið fyrst Craig hefur verið að spila vel. Hlutirnir eru hins vegar fljótir að breytast."