Rændu mann á banabeði hans

Joaquin Rivera, kennari í Fíladelfíu, lést á biðstofu slysadeildar á spítala þar í borg á laugardagskvöld. Hann hafði þá beðið í 80 mínútur eftir hjálp vegna hjartsláttatruflana. Þrír heimilislausir fíkniefnasjúklingar horfðu á Rivera deyja, en í stað þess að sækja hjálp stálu þeir úrinu hans. „Við erum öll eyðilögð yfir því að maður eins og hann hafi yfirgefið okkur á þann hátt sem hann gerði," segir Jesse Bermudez, félagi mannsins, í samtali við AP fréttastofuna.

Rivera hafði gengið á spítalann í Norðaustur Fíladelfíu á laugardagskvöldið eftir að hafa fundið verki fyrir brjósti. Þegar að hann var kominn á biðstofuna ræddi hann við annað fólk sem beið á biðstofunni. Hann leið síðan útaf um klukkustund síðar. Öryggismyndavélar sýna síðan hvernig einn þeirra manna sem hann hafði verið að ræða við stal úrinu hans og rétti félaga sínum það til varðveislu.

Rivera var 63 ára þegar að hann lést.