O'Neill vill ekki tjá sig um Reo-Coker

Martin O'Neill, stjóri Aston Villa, neitar að gefa upp hvort að Nigel Reo-Coker sé í leikmannahópi liðsins sem mætir Cardiff í enska deildabikarnum á morgun.

Reo-Coker var ekki valinn í leikmannahóp Aston Villa fyrir leikinn gegn Portsmouth um helgina. Hann og O'Neill munu hafa lent saman á æfingu fyrir leikinn.

O'Neill ræddi við Reo-Coker í gær en vildi ekki segja hvað fór á milli þeirra.

„Ég ræddi við Nigel en hvað við varðar er það einkamál hvað okkur fór á milli," sagði O'Neill. „Ef hann sjálfur eða einhver nákominn honum vill uppljóstra hvað var sagt þá er það þeirra mál."

Hann sagðist ekki enn hafa valið leikmannahópinn fyrir leikinn á morgun en að Reo-Coker hefði æft með liðinu í dag.