Stal frá ömmu sinni og fatlaðri frænku

Bankastarfsmaðurinn Darren Pease var dæmdur í fjögurra ára fangelsi í Bretlandi fyrir stórfelld fjársvik. Meðal annars stal hann 315 þúsund pundum af fimm ára gamalli frænku sinni sem missti bæði hendur og fætur vegna heilahimnubólgu.

Stúlkan, Ellie Challis, var flutt með hraði á spítala með heilahimnubólgu þegar hún var aðeins sextán mánaða gömul. Læknum tókst að bjarga lífi hennar en hún missti alla útlimi.

Bretar fylltust samúð með stúlkunni og söfnun hófst í kjölfarið. Afrakstur söfnunarinnar var svo lagður inn á reikning sem hinn 33 ára gamli Darren Pease átti að gæta.

Darren átti hinsvegar í erfiðleikum með hjónabandið sitt og eyddi peningnum í skartgripi auk þess sem hann bauð konunni sinni til útlanda.

Darren hreinsaði næstum allan peninginn út af reikningi Challis, en hann skyldi reyndar eftir rétt rúm 200 pund.

Fyrir utan að stela frá fatlaðri frænku sinni þá stal hann einnig ævisparnaði ömmu sinnar sem var alls 65 þúsund pund.

Amma mannsins býr í íbúð á vegum hins opinbera. Svo virðist sem eftirsjá Darrens sé heldur takmörkuð en eftir að hann missti allt flutti hann inn á ömmu sína.

Jafnvel dómaranum blöskraði og sagði: „Það að þú skulir búa hjá ömmu þinni er eins og niðurlag á sérstaklega ósmekklegum brandara.