Ferguson biður Wiley afsökunar á ummælum sínum

Knattspyrnustjórinn Sir Alex Ferguson hjá Englandsmeisturum Manchester United lét dómarann Alan Wiley fá það óþvegið eftir 2-2 jafntefli gegn Sunderland og ásakaði hann um að vera ekki í nægilega góðu líkamlegu ásigkomulagi til þess að dæma leikinn.

Enska knattspyrnusambandið hafði samband við Ferguson og bað hann að útskýra ummæli sín en nú hefur Ferguson formlega beðið dómarann afsökunar á því sem hann sagði en ítrekar þó að honum finnist að dómarar þurfi meira aðhald hvað varðar þolpróf og annað slíkt.

„Ég bið herra Wiley afsökunar á ummælum mínum og þeim óþægindum sem þau kunna að hafa valdið honum. Að sama skapi bið ég enska knattspyrnusambandið afsökunar á ummælum mínum. Eina ástæðan fyrir því að ég sagði það sem ég sagði var að undirstrika að passað yrði upp á að dómarar séu í nægilega góðu ásigkomulagi til þess að dæma í ensku úrvalsdeildinni. Leikurinn er alltaf að verða hraðari og hraðari og pressan er meiri á dómurunum og þeir þurfa því að vera í toppstandi," er haft eftir Ferguson á opinberri heimasíðu United.