Hughes ítrekar að Robinho sé ekki á förum frá City

Knattspyrnustjórinn Mark Hughes hjá Manchester City lætur sér fátt um finnast um sögusagnir þess efnis að Brasilíumaðurinn Robinho sé á leið til Barcelona frá City þegar félagaskiptaglugginn opnar í janúar.

Barcelona hefur ekki farið leynt með aðdáun sína á Robinho og hvað eftir annað hafa viðtöl birst við leikmanninn þar sem haft er eftir honum að það væri draumur fyrir sig að ganga í raðir Börsunga.

Hughes var spurður beint út á blaðamannafundi í dag hvort að Robinho yrði seldur í janúar og svarið var stutt og laggott: „Kemur ekki til greina," sagði Hughes ákveðinn.