Eboue þakkar stuðningsmönnum fyrir þolinmæðina

Arsenal-maðurinn Emmanuel Eboue hefur þakkað stuðningsmönnum Arsenal fyrir að sýna sér þolinmæði á tímum þegar hlutirnir voru kannski ekki alveg að ganga upp hjá honum.

Þessi strákur frá Fílabeinsströndinni hefur mátt þola sinn skerf af bauli eftir slakar frammistöður sem enduðu með því að hann var orðaður við önnur félög.

Eboue segist líða betur núna og ætlar að launa stuðningsmönnunum þolinmæðina með betri spilamennsku.

„Ég vil bara þakka stjóranum og stuðningsmönnunum því þeir hafa hjálpað mér. Ég var mjög vonsvikinn með frammistöðu mína í fyrra en núna tel ég mig vera á réttri leið," sagði Eboue.