Chelsea vill láta fresta banninu

Chelsea hefur farið fram á að banni FIFA verði frestað þar til að niðurstaða fæst í málið frá alþjóðlegum áfrýjunardómstóli íþróttamála, CAS.

FIFA ákvað í sumar að banna Chelsea að kaupa nýja leikmenn til félagsins þar til í janúar 2011 fyrir að fá franska unglinginn Gael Kakuta til að rifta samningi sínum við Lens í Frakklandi fyrir tveimur árum síðan.

Um leið var ljóst að forráðamenn Chelsea ætluðu sér að berjast gegn banninu og hafa nú skotið málinu til CAS.

Í dag birtist svo yfirlýsing bæði á heimasíðu dómstólsins og heimasíðu Chelsea þar sem fram kemur að félagið hafi farið fram á að banninu verði frestað þar til niðurstaða fæst í málið.

Fram kemur að líklegt þykir að beiðni Chelsea verði svarað í byrjun næsta mánaðar.